各位讀者, 大家好~!
小弟再次於《後香港小男人週記》facebook連載, 不過並非阿賓嘅前傳故事, 而是另一個小男人嘅全新短篇, 名為《另一個小男人---Wedding Drawing》, 暫定為11集。
至於《後香港小男人週記---前傳》由於要配合其他計劃安排, 預定於本年較後時間推出。
希望各位會繼續支持!
多謝!
《另一個小男人---Wedding Drawing》
Week -10
「完成啦！」重重咁嘆一口氣之後，我倒後幾步，點起一支煙。
我望住呢幅畫咗幾晚嘅畫作，盡可能忠實咁畫出妳嘅神韻，因為妳响我心目中永遠有一份無可取締嘅美。
當妳知道我成為兼職插畫師時，我曾經答應過响妳嘅「大日子」，會親手畫一幅畫送比妳。我思前想後，最後決定畫出我地初相識嘅感覺，背景係一道紅色嘅大門。
由十年前於大學正門相識開始，妳一步一步，逐年逐月咁佔據咗我內心嘅位置。
我望住畫中嘅妳，眼睛仍然明亮。我記起我地初相識嘅趣事，妳呆呆咁企响紅色嘅大學門口。我完全無意會妳嘅存在，點知妳突然攔截經過嘅我：「師兄，我想問邊度係學生事務處？」
初次見妳，有一種清澈如水嘅感覺。
「妳係新生？」一問。
「係。」一答。
「去辦學生証？」再問。
「吾！吾！」再答。
「咁一齊行啦！我帶妳去。」
去到學生事務處前，妳不停咁多謝我。
「估唔到有咁好人嘅師兄，我睇我無選錯大學。多謝你！」當日傻更更嘅妳仲會低頭致謝。
「我諗妳搞錯咗。」我話。
「吓？我唔係好明…」
「我唔係妳師兄，我都係新生。頭先見到妳張入學通知書，妳同我仲係同系。」
「咁都多謝你。但係，你點識嚟？仲咁熟路。」
「寄通知書比妳果時，有一份須知。我諗妳應該無睇過。」
見到妳一面尷尬，我完全無同情之心，反而再踩多一腳。
「咁既然大家係同學仔，不如我地交換電話？」妳問。
「不必啦！反正日後課室都會見到。」我答。
當日嘅心高氣傲，令無知嘅我以為交朋友，最好搵比自己聰明嘅人。坦白講，當時我完全睇妳唔上眼，覺得妳只會係我大學生涯之中一位「無咩用」嘅同學。就係咁，我揮一揮手就走開咗。
入學之後，原來我地不只同一學系，更被編為同一個小組。單係第一個學期，四科之中，竟有三科與妳同組。雖然我一向唔喜歡與蠢人為伍，不過為免一入學就將人際關係搞差，我唯有繼續忍受妳視我為「打電話問功課」嘅主持。
一個學期過去之後，下一學期又係四科中三科。妳興高采烈咁同我講：「Arthur，我地又有機會合作啦！」
「Rita，我想提一提妳…當兩個人同一水平先叫合作。我只係一直幫緊妳攞分。」
「我都有貢獻嘅！我一定唔會做 free-rider。」
「係！咁麻煩妳今個學期做完功課之後，就記得save 喇！」
「唔好再提啦！衰人！」
經過一個學期之後，呢種相處方式已經慢慢形成。
响第二個學期之中，有一科嘅計分係完全100%依靠考試，而且仲直接影響係唔係可以升Year 2。我仲記得妳千方百計咁要求我幫妳：「Arthur，你一定要救我呀！」
「考試呢方面，我無可能代妳考。」
「你一定有方法。上個學期，就只有你全科攞A，你教下我啦！」
我諗咗一陣，打算同妳開個玩笑。
「好！我話個秘密妳聽…我同每個tutor 都有一手，男女我都受。係佢地話我知會出咩！如果妳想知，咪自己去問下佢地囉！我諗佢地唔介意3P。」
忽然間，妳眼中充滿淚光，強忍住淚水同我講：「我真係好認真咁讀。我唔似你咁聰明，所以先搵你幫手啫！你根本唔明白我幾比心機先升到大學，我唔想就咁re-take。你唔教就算啦！」
我第一次見到認真嘅妳，同時亦係第一次見到妳流淚。果日之後，直到考試前，妳無再同我講過一句說話。
好成績從來唔會天降而來，我嘅「秘密武器」其實就係將所有可能於考試會出嘅題目，都預做一次，再背熟去考試。
Year 1第二個學期考試前，我將所有題目做夠兩份。兩份觀點要完全唔同，否則必定被改卷老師發現。其中一份我背熟咗去考試，另一份send 咗e-mail 比妳。
成績出咗果日，我响locker 發現一張thank you card。上面寫住：
「我知你一定唔忍心！
你唔好以為可以拋低我。哈哈！
多謝你！」
當日嘅我，對呢張卡只係一笑置之。而我從來無想像過「朋友」會被拋低。
十年前，我地由同學開始，慢慢成為朋友。
---婚禮前十星期---
Search